Paramedical colleges : 'पॅरामेडिकल' आहे, पण नोकरी नाही; पदभरती सेवा प्रवेशात अभ्यासक्रमांचाही समावेश करण्याची मागणी

Paramedical colleges in maharashtra: ऑपरेशन थिएटरमध्ये कुशल तंत्रज्ञ राहावेत, यासाठी बीएस्सी इन ऑपरेशन टेक्नॉलॉजी (शस्त्रक्रिया तंत्रज्ञ) हा अभ्यासक्रम सर्व शासकीय महाविद्यालयात सुरू करण्यात आला होता. परंतु, १४ वर्षे झालीत, हा अभ्याक्रम पूर्ण केलेल्यांची पदभरती झालीच नाही. त्यामुळे शस्त्रक्रिया तंत्रज्ञ पदाची भरती करावी, अशी मागणी पुढे आली आहे. मोल्डरूम तंत्रज्ञ हे पद सार्वजनिक आरोग्यसेवा तसेच वैद्यकीय शिक्षण व औषध द्रव्ये विभागांतर्गत आहे.

नागपूर : राज्यातील शासकीय वैद्यकीय महाविद्यालयांमध्ये पॅरामेडिकलचे अभ्यासक्रम (Govt Paramedical Colleges in maharashtra) तर आहेत. मात्र, प्रवेश सेवा नियमात त्यांचा समावेश नसल्याने हे शिक्षण घेणाऱ्यांवर बेरोजगार राहण्याची वेळ आली आहे. त्यामुळे पदभरती सेवा प्रवेशात या अभ्यासक्रमांचाही समावेश करण्याची मागणी असोसिएशन ऑफ अलाइड हेल्थकेअर प्रोफेशनल्सने वैद्यकीय शिक्षणमंत्र्यांची भेट घेऊन केली.

बीएस्सी पॅरामेडिकल टेक्नॉलॉजी ( कम्युनिटी मेडिसिन ), बीएस्सी पॅरामेडिकल टेक्नॉलॉजी ( फॉरेन्सिक मेडिसिन ), बीएस्सी पॅरामेडिकल टेक्नॉलॉजी ( इमर्जन्सी मेडिसिन ), बीएस्सी पॅरामेडिकल टेक्नॉलॉजी ( इंडोस्कोपी टेक्नॉलॉजी ) हे अभ्यासक्रम २०१०पासून राज्यभरातील सर्व शासकीय वैद्यकीय महाविद्यालयांमध्ये सुरू आहेत. परंतु, कुठल्याच शासकीय पदभरतीत या विद्यार्थ्यांना प्रवेश नाही. त्यामुळे जवळपास ३ हजारांहून अधिक पदवीधर हा अभ्यासक्रम पूर्ण करूनही बेरोजगार आहेत. त्यामुळे 'गट-क'मधील संबंधित पदांसाठी लवकरात लवकर सेवा प्रवेश नियम तयार करावेत, अशी संघटनेची मागणी आहे.

ऑपरेशन थिएटरमध्ये कुशल तंत्रज्ञ राहावेत, यासाठी बीएस्सी इन ऑपरेशन टेक्नॉलॉजी (शस्त्रक्रिया तंत्रज्ञ) हा अभ्यासक्रम सर्व शासकीय महाविद्यालयात सुरू करण्यात आला होता. परंतु, १४ वर्षे झालीत, हा अभ्याक्रम पूर्ण केलेल्यांची पदभरती झालीच नाही. त्यामुळे शस्त्रक्रिया तंत्रज्ञ पदाची भरती करावी, अशी मागणी पुढे आली आहे. मोल्डरूम तंत्रज्ञ हे पद सार्वजनिक आरोग्यसेवा तसेच वैद्यकीय शिक्षण व औषध द्रव्ये विभागांतर्गत आहे.

हे पद रेडिओथेरपी विभागाचे असून या पदाला लागणारा अभ्यास व कौशल्य हे बीएस्सी इन पॅरामेडिकल टेक्नॉलॉजी (रेडिओ थेरपी) या अभ्यासक्रमात शिकविण्यात येते. परंतु, सेवा प्रवेश नियमांमध्ये रेडिओग्राफीचा निकष दिला आहे. या पदवीचा रेडिओथेरपीशी संबंध नाही. त्यामुळे याबाबतच्या पदभरती नियमांमध्येही दुरुस्तीची गरज आहे, असे यावेळी संघटनेचे अध्यक्ष राजेश उके यांनी वैद्यकीय शिक्षणमंत्री हसन मुश्रीफ यांच्या लक्षात आणून दिले. या बैठकीला वैद्यकीय शिक्षण विभागाच्या अधिकाऱ्यांसहच संघटनेचे युगांत फासे, निखिल पुरी, पीयूष तांबे उपस्थित होते.