Teacher Recruitment 2025: शिक्षकभरती प्रक्रियेस मुदतवाढ, जागांबाबत अस्पष्ट चित्र; कार्यवाहीस ३१ मार्चपर्यंत मुदत

Teacher recruitment 2025 maharashtra apply online : पवित्र पोर्टलवर सुमारे १९०० आस्थापनांच्याच जाहिरातींची प्रक्रिया झालेली असून अद्याप सरकारी शाळांची प्रक्रियाही अपूर्ण असल्याचे सूत्रांनी सांगितले. त्यामुळे राज्यात दुसऱ्या टप्प्यात किती शिक्षकांच्या जागा भरल्या जाणार हे अस्पष्ट आहे. पात्रताधारक उमेदवारांच्या जाहिरातींकडे लक्ष लागले आहे, परंतु प्रक्रिया संथ गतीने सुरू असल्याने उमेदवारांमध्ये संताप आहे.

Teacher recruitment maharashtra 2025: शिक्षक भरती प्रक्रियेचा दुसरा टप्पा सुरू आहे. संस्थांना प्रक्रियेत पदभरतीसाठी जाहिरातीच्या कार्यवाहीस आता ३१ मार्चपर्यंत मुदतवाढ देण्यात आली आहे. बऱ्याच व्यवस्थापनांची बिंदूनामावली मागासवर्गीय कक्षाकडून प्रमाणित न झाल्यामुळे मुदतवाढ देण्यात आल्याचे सांगण्यात येते. लांबणाऱ्या प्रक्रियेमुळे शिक्षक भरती किती जागांसाठी होणार, हे अद्याप निश्चित नाही. दोन महिन्यानंतरही राज्यात केवळ सुमारे १९०० व्यवस्थापनांनी जाहिरातीची प्रक्रिया केल्याचे सूत्रांनी सांगितले. राज्यातील अनुदानित, अंशतः अनुदानित व विनाअनुदानित प्राथमिक, माध्यमिक व उच्च माध्यमिक विद्यालय/कनिष्ठ महाविद्यालयातील शिक्षण सेवक, शिक्षकांची पवित्र प्रणालीमार्फत दुसऱ्या टप्प्यातील पदभरतीसाठीची प्रक्रिया सुरु आहे.

दुसऱ्या टप्प्यातील शिक्षकांच्या रिक्त पदांच्या जाहिराती देण्यासाठी संस्थांना पुन्हा मुदतवाढ देण्यात आली आहे. ३१ मार्चपर्यंत संस्थांना प्रक्रिया पूर्ण करता येणार आहे. जाहिरातीच्या कार्यवाहीस मुदतवाढ मिळाल्याने संस्थांना दिलासा मिळाला. जानेवारीपासून सुरू असलेल्या प्रक्रिया तीन वेळा मुदतवाढ देण्यात आली आहे. संस्थांना जाहिरातीची कार्यवाही करण्याची प्रक्रिया सुरु असताना, दुसरीकडे शिक्षक अभियोग्यता व बुद्धिमत्ता चाचणी (टीएआयटी) पात्र विद्यार्थी उमेदवारांना पवित्र पोर्टलवर स्वप्रमाणपत्र पूर्ण करण्यासाठीची प्रक्रियाही सुरू आहे. ११ मार्चपासून सुरु झालेल्या प्रक्रियेत उमेदवारांना २० मार्चपर्यंत प्रक्रिया पूर्ण करावयाची आहे. ही प्रक्रिया संपत आली तरी जाहिरातींबाबत स्पष्टता नसल्याने नेमक्या किती जागा रिक्त याबाबत उमेदवारांमध्ये सांशकता कायम आहे.